Kunċett tal-Premju
Il-Premju Soċjetà Ġusta huwa ċelebrazzjoni tal-ħidma, l-impenn u d-dedikazzjoni ta’ diversi individwi u għaqdiet fis-settur tad-diżabilità.
Għan
L-għan ta’ dan il-premju huwa li jiġu ċċelebrati l-kisbiet ta’ individwi u organizzazzjonijiet li jappoġġjaw kultura t’iżjed Drittijiet għall-Persuni b’Diżabilità. Id-dmir tal-Gvern huwa li jesprimi l-apprezzament tiegħu lil kulmin qiegħed jaħdem għal soċjetà iżjed inklussiva, fejn persuni b’diżabilità u dawk qrib tagħhom, bħall-familjari u assistenti tagħhom, ikunu jistgħu jesperjenzaw atteġġjamenti iżjed miftuħa, aċċessibilità, u kundizzjonijiet li jinkoraġġixxu l-għixien indipendenti u fil-komunità.
Il-prinċipju li se jigwida l-għażliet għal dan il-premju huwa li jkollna soċjetà aktar ġusta fejn il-persuni b’diżabilità jieħdu sehem attiv fil-komunità.
Kategoriji tal-Premjijiet
A. Premju għal Min Iħaddem / Kumpanija Inklussiva
Dan il-premju jirrikonoxxi lil min iħaddem, kumpanija jew organizzazzjoni li turi impenn eċċezzjonali lejn l-inklużjoni ta’ persuni b’diżabilità fil-post tax-xogħol.
B. Premju għal Ħaddiem / Membru tal-Istaff li Jippromwovi l-Inklużjoni
Dan il-premju jirrikonoxxi ħaddiem jew membru tal-istaff li, permezz tal-ħidma, l-impenn u l-attitudni tiegħu/tagħha, i/tkun għamel/għamlet differenza pożittiva fil-ħajja ta’ persuni b’diżabilità u/jew ikun ikkontribwixxa b’mod sinifikanti lejn ambjent aktar inklussiv, aċċessibbli u ġust.
Ċ. Premju għall-Eċċellenza u l-Inklużjoni fl-Isport
Dan il-premju jirrikonoxxi persuna, tim, klabb jew għaqda li tkun uriet dedikazzjoni jew kontribut eċċezzjonali u/jew kisbiet fil-qasam tal-isport u tal-inklużjoni.
D. Premju għall-Eċċellenza u l-Inklużjoni fl-Arti u l-Kultura
Dan il-premju jirrikonoxxi persuna, grupp jew għaqda li, permezz tal-arti, il-kultura jew forom oħra ta’ espressjoni kreattiva, tkun tat kontribut sinifikanti lejn soċjetà aktar inklussiva.
E. Premju għal Għaqda Mhux Governattiva għall-Inklużjoni
Dan il-premju jirrikonoxxi għaqda volontarja jew mhux governattiva, minn kwalunkwe settur, li permezz tal-ħidma jew ta’ inizjattiva partikolari tkun tat kontribut eċċezzjonali lejn l-inklużjoni u l-parteċipazzjoni sħiħa ta’ persuni b’diżabilità fis-soċjetà.
L-applikazzjonijiet jagħlqu nhar it-Tnejn 2 ta’ Novembru 2026 f’nofsinhar.
Aktar dettalji:
